8 March 2021, 05:01 WATNew Informate 3 hours wey don pass
Wia dis foto come from, CBS
Oprah Winfrey Prince Harry & Meghan Markle latest interview dey buzz internet across di world.
And no doubt, Meghan and Harry drop plenti bombshells during di two-hour interview about life inside di Royal Family [Buckingham Palace].
Here be summary of di gist and highpoints for inside dis tok Prince Harry & Meghan Markle give media mogul Oprah Winfrey:

  • Among di revelations, Meghan say she bin get times wen she “bin no want to be alive anymore”
  • Meghan say one member of di Royal Family get concerns about how dark her son Archie skin go be
  • Harry say now him don dey “cut off” financially, which be why di couple dey find Netflix and Spotify deals
  • She say she bin no know so much wen she join di family, and bin dey surprised wen dem ask her to bow wen she meet di Queen
  • Prince Harry reveal say dia new baby – wey fit land during summer – go be a girl
  • Meghan reveal say she and Prince Harry marry inside a simple ceremony three days before dia lavish wedding, wey dem do “for di world”

Wia dis foto come from, CBS
Di interview come after Harry and Meghan decide to comot bodi as senior members of di Royal Family last year.
Harry and Meghan first met on a blind date arranged by a mutual friend in 2016, and married in 2018.
Di Duke and Duchess of Sussex interview wit Oprah Winfrey na a two-hour CBS primetime special.
“Oprah with Meghan and Harry”: Wey be Primetime Special, na Harpo Productions produce am.
Di interview go dey broadcast inside di UK on Monday night on ITV at 21:00 GMT and on ITV Hub.
Oprah and Meghan speak about di Royal Family deciding not to make Archie a prince.
Meghan say e also get conversations within di family – wey Harry tell her – “about how dark him skin fit be wen dem born Archie”. She refuse to say who tok am, say e go dey “very damaging to dem”.
Harry say “dat conversation, I no go ever share am”. “At di time e bin look somehow, I bin dey a bit shocked”. Harry also say him bin dey hurt say no-one from him family ever condem racist media coverage of dem.
Meghan reveal to Oprah say she bin get di thinking of taking her own life alias suicidal thoughts, and “just bin no want to be alive anymore”. She say she become lonely after dem put limits on di things she fit do and she bin no go out in months.
Harry say he “bin no get idea of wetin to do” and “enter a very dark place as well”. “I bin no get anyone to turn to,” he tok.
Wia dis foto come from, Reuters
Harry say im get a “really good” relationship wit him grandmother, di Queen, but di relationship wit im father don suffer, he say. “E get a lot to work through for there,” he tok.
“I feel really let down because im don go through something similar, he know wetin pain feel like… and Archie im grandson. But at di same time, of course I go always love am but e get a lot of hurt wey don happen and I go continue to make am one of my priorities to try and heal dat relationship.” About Prince William, he say dem dey on “different paths”.
Di prince also say im family “literally cut me off financially” and dat na why di couple don strike deals with Netflix and Spotify so dem fit afford security. He say him get di money wey im mother, Princess Diana, leave for him.
Meghan tok about wetin e bin dey like joining di Royal Family. She say she bin no realise say bowing to di Queen dey happun within di family – she bin think say e be just part of di “fanfare”. She say she no do any research about di family beforehand and bin never look Harry up online.
Harry say di couple don watch some of di Netflix royal drama di Crown. Wen Oprah Winfrey ask if dem watch am, Harry reply wit shy face: “I don watch some of it. We don watch some of it.”
Dem also ask Meghan about her relationship wit di Duchess of Cambridge, Kate. E come after rumours inside newspaper reports wey suggest say Meghan bin make Kate cry inside one fight about flower girl dress dem for Harry and Meghan wedding. Meghan said di “reverse” na true and say Kate later buy flowers a note to settle di matter.